صدیق
ناداني د هر نادان ښه د دانا کا
تور صيقل آيينه لا په مخ صفا کا
نصيحت د هر هوښيار کار د نادان شي
مبصر به کار په څه د نابينا کا
صفايی د زړه په کار د حقيقت وي
د نادان خوښی د زړه سپينه قبا کا
بې خبر له مرګه کلک په خوب اوده وي
تل بيدار په توره شپه کار د سبا کا
سپين ويښته نخښه د نور ده که پوهيږې
توره شپه په نمرخاته سپينه رڼا کا
له وطنه واته ګران دي په معنی کې
په چمن کې بيحاصله ګل خندا کا
د دوزخ آتش رښتيا کينه د زړه ده
تخم زمکه د دهقان په وخت ريبا کا
صدف کښته د ګوهر بار وړي صديقه!
سبکبار حباب مقام سر د دريا کا