فرید باراني
غزل
هلې ځلې چې هر څوک هره شېبه کړي
خپله موخه به یې کور لره مېلمه کړي
هغه څوک به د مقصد منزل ته رسي
چې د ژوند د طوفانو مقابله کړي
بې زحمته به راحت کله پیدا شي
په خالي لاس به لمده کله کاسه کړي
هم د مینې هم د دین او د روزګار کار
په دا ټولو کې باید چې تلوسه کړي
ازمایښت ته د زړګي مې حاجت نشته
دې څپو کې د طوفان به کله شپه کړي
خپل تدبیر دې د سنجش منګول ته پرېږده
چې د عقل دلته څه شی فیصله کړي
په دې حال دې افتخار وکړه زړګیه
چې د خپل په لاس خوړینه اماده کړي
بې زحمته څوک او لوټه د یو شانې
دا به ښه وي چې پرې ډکه هدیره کړي
هغه وخت به د ساحل دې غېږې باد شي
چې زړګیه د طوفان سره جګړه شي
۱۳۸۵-/ ۱۰/ ۹