فرید باراني
د دې بد مسته لېونتوب څخه یې
شپږ میاشتې تېرې نه وې
چې د تقوا دېوال یې ونړاوه
او د محبت ګرداب ته ولوېده
زموږ د رسومو په ګرداب کې لېونۍ غوندې وه
لومړی د ښکلو په بازار ګډه شوه
او له یو ځوان سره یې مینه وکړه
د عشق کیسه یې ورته سپینه وکړه
د عقل کار نه و، شهوت پرې غلبه کړې وه
عقل یې سلب و، محبت پرې فیصله کړې وه
وروسته له څه مودې نه
د دوی د کلي د رسومو مشر
چې د دې پلار یادېده
پر دې مسکینې باندې وپوهېده
ها د پګړۍ او د بریتونو مشر
هغه د قام د ګناهونو مشر
د خپل ریا چپن یې واغوستله
د خپلې لور خونې ته ودرېده
دا په خپل پلار له ورایه وپوهېده
او له بلې خوا
مینې د حل په کږو لارو پوهولې وله
د پلار د خشم او خبرو مخکې
یو وار راپورته شوله
او د خپل پلار د اوامرو مخته ودرېده
او د هغه د رواجونو په تګلاره باندې
یې د اسلام ډبره کېښودله
د ده په ژوند کې دا لومړی ځل ولو
چې د خپلې لور په خاطر
یې د سکوت جامه هم واغوستله
او زموږ فردي ازادي
د دې د سر خیرات و
چې ټول ازاد ازاد شول
او
په دې موضوع کې یو ریښتینی اسلام منځ ته راغی
۱۰-۴-۱۳۸۸ - هرات