فرید باراني
ما سره مینه وکړه
لېونی شوی یمه
د سر مغزو مې دوه لاسونه زېږولي بغاوت لپاره
لومړی خو زه ددې ناکامه ژوند
ګرېوان ورته تر پایه څیرم
وروسته د درد اوناهیلو اوښان
هر یو تر ستوني نیسم
تر څو یې اووه واړه نفسه ووځي
وروسته راځم
خپل د مغزو په لاسو
خپل د زړه ور ماتوم
او خپل د نور له زړه نه
دا ژوندی درد راباسم
خپل د مغزوون په لاسو یې سولوم
چې لکه سپی وژاړي
وروسته یې ولمه پر ځمکه باندې
چې هلاکت وویني
وروسته لاسونه په مغزو کې منډم
د دښمنۍ او بغاوت لمنې ورو ټولوم
بیا به ورځم د هغې ښکلې نجلۍ
د پاکې روح د ګلابونو باغ ته
خپل د مغزو په لاسو
یوه لیکنه په دیوال ټک وهم:
ما سره مینه وکړه
لیونی شوی یمه
ما سره مینه وکړه
چې مې مغزو دي زېږولي بغاوت لپاره سره لاسونه
۱۳۸۹-۷-۱- جلال اباد صفاراډیو