فرید باراني
دانه دانه
په زړه راوري لکه څاڅکي د سنتور د مضراب
زما له حیرته ځنې
د کوم یاغي شوي طوفان مخه نیسي
عشق زما او ستا د عظمت ژباړن دی
هلته چې ته په خپلې ټولې استغنا شکي شوې :
عشق د زیتون د رڼاګانو په تودو څانګو کې ونڅېده
هلته چې زه شکي شوم :
د ستومانیو اهرامونومې فرعون له رودِ نیل نه وایست
او موسی غرق شو رانه
خلیل الله د اور څپو لپه کړ
د نوح کښتۍ ډوبه شوه
عیسی په دار شو او محبوب د غر په خوله شهید شو
ستا به په یاد وي کنه
زما د زړه ستوماني
د کاېناتو حجم څومره ډېر کړ
څومره درانه شول مدارونه د ایمان دکشالو په تن کې
قیامت څو نور کلونه وځنډېده
او عشق په خلاصه غاړه څنګه راغی
دانه، دانه،
په زړه را اوري لکه څاڅکی د سنتور د مضراب
زما له حیرته ځینې
د کوم یاغي شوي طوفان مخه نیسي
۶ جولای ۲۰۱۶ - برلین