غوښتل مې خدای ته یو څه ووایمه

ما د جهان په مسخه شوي روح کې

د حقیقت د لیلامي بازار جامې واغوستې

په بې تڼیو ګرېوانو کې مې د درد دمېلمستیا ستړي رازونه پټ کړل

غوښتل مې خدای ته یو څه ووایمه :

دا مې جامې دي چې بدلېږي د چاودلي تبسم په مات کې

غوښتل مې خدای ته یو څه ووایمه :

چې ځینې ځینې انسانان ولې د خپل روح په تاوده تنور کې نه ځایېږي؟

کله چې روح د تن د غرونو اوږو بار سره دوستي نه کوي

کله چې تن پړسېږي

او شپې زموږ د خفګانونو ادرسونه نابینا په نیمه لار ورکوي

تر تا یې نه رسوي

او موږ په خپلو بې تڼیو ګرېوانونو کې د تا په انتظار مړېږو ۲۰ ډېسمبر ۲۰۱۶