ستا په مخ کې چې حساب د جمال نشته

ځکه ما څخه د صبر مجال نشته

ته د سر و د مال ويره په ما مه کړه

ويره ما څخه د سر و د مال نشته

زه په دا سبب له ويري سره ريږدم

چې ستا ويره کې ثواب دی وبال نشته

که وعده د يوې چاري يو ساعت کړې

د هغې چاري اميد مي په کال نشته

د شهيد و حال ته ګوره حال يې څه دی

بې تا هسې زما حال دی بل حال نشته

روشنايي مي د چشمانو ستا ديدن دی

په داکور کې بل څراغ و مشال نشته

په جويبار زما د سترګو سرو ته يې

په دا نهر باندي بل څه نهال نشته

مخ دی بې خط و بې خاله هسې زيب کا

چې يې هيڅ حاجت په خط و په حال نشته

مخامخ که راته وګورې دلبره

په کاته کې دي ثواب دي وبال نشته

د افتاب په مخ کې هره ورځ زوال دی

ستا د حسن په افتاب کې زوال نشته

ستا په يادو کې رحمان هسې مشغول دی

چې په زړه کې يې هيڅ غم د وصال نشته