دنيادار د دنيا کار کا زه د دين

خوانين زما په ملک دې خوشه چين

هيڅ کم نه دی تر سپين مخ د دلبرانو

نلکه ښه دي زما شعر نمکين

مراد له تورو سپيونو واړه دلبري ده

موقوف نه دي دغه کار په تور و سپين

مرتبه د سليمان چې چا له ورشي

هيڅ پوره نيمګړي نه دي پر نګين

چې رنګين رنګين مضمون پرې ښکلي نه وي

څه پکار دي د بياض ورق رنګين

خوند په خوله دي نه په څکه نه په خواړه دي

اب و خور که د چا تلخ وي که شيرين

غرض خوب دي که په خس وي که په خاوره

څه حاجت دي په بستر و په بالين

مصرۍ توره هم په بد غلاف کې زنګ شي

خدای څوک مه کړه د بدانو همنيشين

څه عجب که په ورځ مهر په شپه ماه شي

د رحمان اشنا چنان دي هم چنين