چې مشغول نه وي د ترکو په جمال څوک

نور به څه کا په هان کې اشتغال څوک

د بل خط په عبارت به څه نظر کا

چې نظر کاندي د ستا په خط و خال څوک

نور خوبان د ستا تر مخ پورې دي هسې

لکه بل کا د افتاب په مخ مشال څوک

چې عنقا شو اهل دل په دا دنيا کې

ترو به څه وايي و چا و ته احوال څوک

که عاشق په عشق کې ژاړي هيڅ ګرم نه دی

په دا هسې درد کې نه لري مجال څوک

چې يې قيل و قال له ياره سره وشي

له نور چا سره به څه کا قيل و قال څوک

چې په اصل کې خدای نه دی پيدا کړی

ترو به څه غواړي د ستا د مخ مثال څوک

سرخرويي د هر سړي په ځيګر خون ده

نه هغه چې په سر اچوي سور شال څوک

مخ روڼی دی د عاشق په خپلو اوښو

په دا نه شي چې يې مږي په رويمال څوک

د دنيا چارې فاني دي مرد هغه دی

چې نظر کا په حرام او په حلال څوک

هر چې کر کا د وربشو غنم غواړي

له خاطره دې بېرون کا دغه خيال څوک

سړی بويه چې په نېک عمل نازېږي

نه چې ناز کا د دنيا په ملک و مال څوک

که يې شعر د رحمان مومند تر غوږ شي

غوږ به نه باسي په شعر د خوشحال څوک