رحمان بابا
چې يې نقش په زړه خيال شي د اشنا
صدقه يې سر و مال شي د اشنا
پس له مرګه به يې تېغ هسې مخ روڼ وي
چې اشنا په تېغ حلال شي د اشنا
په اسمان د اشنايۍ به يې مکان وي
چې زمين غوندې پايمال شي د اشنا
خوشحالي زما د زړه په هغه دم وي
په هر دم چې زړه خوشحال شي د اشنا
روح هغه ساعت داخل ګڼم په تن کې
چې مې دخل په وصال شي د اشنا
هم هغه يوه ګړۍ راباندې کال وي
چې يوه ګړۍ محال شي د اشنا
نور د هيچا قيل و قال مې په کار نه وي
چې ترغوږ مې قيل وقال شي د اشنا
زرغونه کاندي دانه زما د عيش
چې په زړه مې زرغون خال شي د اشنا
نه بل څوک زما طبيب بې اشنا شته دی
نه بل څوک به په مثال شي د اشنا
د رحمان نظر په هيچا باندې نه وي
چې نظر يې په جمال شي د اشنا