رحمان بابا
عالمان دي روښنايي د دې دنيا
عالمان دي د تمام جهان پېشوا
که څوک لار غواړي وخدای هم و رسول ته
عالمان دي د دې لارې رهنما
کېمياګر که د کېميا په طلب ګرځي
همدمي د عالمانو ده کېميا
په مجلس د عالمانو به سره زر شي
که څوک کاڼی وي که لوټه د صحرا
جاهلان دي په مثال د مردګانو
عالمان دي په مثال د مسيحا
چې مرده يې له نفسه ژوندی کېږي
عالمان دي واړه هسې اوليا
هرسړی چې رتبه نه لري د علم
سړی نه دی خالي نقش دی ګويا
زه رحمان حلقه بګوش د هر عالم يم
که اعلی دی که اوسط دی که ادنا