چې قانع په يوه څاڅکي شي صدف
 قيمتي ګوهر یې ځي په هر طرف

که عزت غواړي قانع پخپل قسمت شه
 ورکړه لا که بزرګي غواړي شرف

بندول د دنيا بند د جهنم دی
 آزاده و ځکه کيښوله په کف

د دنيا خلق مې وليده په سترګو
 يو یې جمع په حرص کا، بل تلف

چې ژوندون همېشه نشته په دا څه شق
 په حشمت که سليمان شي يا آصف

د سړي څربښت په علم په حکمت شي
 د چارپايو څريدل وي په علف

که ځوانمرد یې بل آزار مه کړه په ګلو
 ځان د ښو د بدو تير ته کړه هدف

تل له خدايه ترس کوه عبد القادره!
 حق خایف ته دي ویلي لَا تَخَفْ