ملا لتاړ
ګډ چې ستا د عشق په درياب شه زما روح
نور په مثل د حباب شه زما روح
چې رفتار یې په درياب کې هميشه که
عاقبت په کې غرقاب شه زما روح
چې خبر د تا په مينه محبت شه
نور له غیرو اجتناب شه زما روح
اجتناب کاندي له نورو کتابونو
چې خبر ستا په کتاب شه زما روح
خو چې بند شه ستا د مینی په صدف کې
د ګوهر په څير په آب شه زما روح
چې یې ولید بربنډ مخ ستا له نقابه
له عذابه په ثواب شه زما روح
زه (لتاړ) چې پوه د مینی په روزګار شوم
په دنیا کې انتخاب شه زما روح