عبدالحمید مومند
څه برباد درومي زما فریاد و نوله
په خاطر د دلبرانو ناقبوله
زر په زر به ظالم حسن د بتانو
کاندي خدای توره بلا د خط نزوله
په عاشقو کې معقول هغه باله شي
چې يې شېخ و ملا بولي نا معقوله
که په کار د عاشقۍ بې عزت کېږم
خدای مې لرې مه کړه دا پېغور له کوله
چې عاشق د عاشقۍ په کار شرمېږي
شرمنده به شي تر خدای و تر رسوله
مسئله د صبر و زهد په هیڅ قول
د عاشقو په مذهب نه ده معموله
چې مې هیڅ په غوږو نه لګي ناصحه
بېهوده پندو وینا وايې فضوله
اوس اقرار په بانګ بلند د عشق په کار یم
پټاوه را باندې نه شي عشق په پوله
د دنیا له هوسونو څه رنګ نهیل شوی
اې حمیده! د خپل یار په غم مشغوله