سر مې هسې بهر ور دی ستا له درده

چې بخڅه د در ګوهر دی ستا له درده

غیر فکر دزوخي شه پکې سوځي

زړه مې ګرم تر سقر دی ستا له درده

سرتړونی نوې میاشت تر سر جار باسي

د هر ښکلي درد په سر دی ستا له درده

یو زګیروی کا په مسجد په میخانه کې

مسلمان دی که کافر دی ستا له درده

د ژوندون کوتاه شپه را باندې کال شوه

چې و مرګ ته مې اختر دی ستا له درده

تل مې تن د عشق له اوره هسې ایشي

پروت په تبه کې شېبر دی ستا له درده

څه له کړې دارو درمان زما و داغ ته

داغ مې کله مرور دی ستا له درده

د مرهمو غمازي به يې بېل نه کا

چې مې خوا په خوا پرهر دی ستا له درده

د حمید د نارو و یار مه کړه دلبره

هیڅ په خود نه دی اوتر دی ستا له درده