عبدالحمید مومند
آشنايي ده د دنیا د آشنا پوچه
د لاله له ګلو غواړې بقا پوچه
لکه څوک چې کټوری غواړي له زاڼو
هسې شان شوه د وفا تمنا پوچه
چې سودمن په آشنايۍ د آشنا نه شي
وکړه مه شه دا بې سوده سودا پوچه
چې حاجت غواړي له یاره د دې دور
وهي منډه د برېښنا په رڼا پوچه
له کرده به دې مردي سبا لیده شي
مه کړه نن په لاپو شاپو غوغا پوچه
بې کرداره ګفتار محض سردرد دی
مونده نه شي د مراد مغز په دا پوچه
چې نا اهلو ته يې څوک تر خولې وباسي
دردانه کاندي د خپلې وینا پوچه
چې دا خپل څېرې ګرېوان پرې نه ټولېږي
د شبنم په ژړا ګل کا خندا پوچه
چې پتنګ په اور کې غږ نه کا حمیده!
عندلیب کاندي په ګلو غوغا پوچه