عبدالحمید مومند
ښه مې وکاته خوبان د هر طرف
په یوه مې نه شه غم ستا برطرف
نور به زه تلم له تا سره کوم حسن
چې اسمان ته پورته لاړ د نمر طرف
خړ شي ستا له ساده مخه مخ د ناوې
که هزار ځله يې کا زېور طرف
شکسته زړونه بې ځایه آرام غواړي
هیڅوک نه کا ملګري د لر طرف
عاشقي په اختیار نه شي که کیدلای
چا به څه کاوه د شور و شر طرف
په طرف د مینې مخ د هیچا مه شه
دا طرف دی واقعي سقر طرف
چې په زړه سختې خواري د عاشقۍ کړم
نشته بل تر عاشقۍ بدتر طرف
هیڅ مې غم د ځنکدن د تلخۍ نشته
که مې یار په بالښت ناست وي سر طرف
که د خان طرفداري پرېږدي حمیده!
ژر به بیامومې د یار د در طرف